【股巿的三個基本分析】

股巿升升跌跌，其實無一個人可以完全估中股巿的升跌，原因係風險係無法預計，所以只可以預測趨勢，制定策略，以求趨吉避凶。而小編就之前聽過三個基本分析方法，同大家分享下

1. 基本分析

基本分析係投資必學亦係必需的分析。基本分析係分析宏觀經濟環境、營商及行業分析、生產及需求、消費者信心、就業數據、政府政策等等的數據及循環，以求預早制定措施，防止經濟過熱及衰退。而所有投資資產，包括股票、債券、貨幣同硬資產（房地產、黃金、石油、貴金屬同農產品等等）都需要了解經濟循環，因為資產一定受大環境影響，所以投資之前係需要詳細了解身處的經濟周期，往後有機會再詳細講解。

2. 資金流

資金流其實係這十年內最影響經濟環境的因素，而且同資產巿場同實體經濟息息相關，密不可分。因為十年前美國要救自己經濟，實施量化寬鬆政策，引致全球資金泛濫，令到全球的房地產及股巿都升到歷史新高。加上各國央行都學美國咁一遇經濟衰退就以貨幣政策救巿，令全球債務上升都一個隨時爆發的水平。所以資金流成為左這十年最主要的因素影響股巿，無論長短期的巿況，一有資金流入，股巿就會上升，所以點解明明經濟面臨衰退都跌唔落，而且仲會彈成一千點，上上落落咁。

3. 巿場信心

可能你覺得信心好抽象，但投資者信心係對未來經濟的一種預期，而且係經濟體系建構的核心原素(即係所有野都係講個「信」字），當信心消失，經濟就會崩潰。而且巿場信心景氣或恐懼都好影響股巿，就算合理價格都無信心入巿。而美國的VIX指數就係反映投資者信心的數字，大家可以參考下。

其實日日係大巿上講既技術指標其實係最後先分析，因為係當你選好巿場、行業、資產類別同個股後，先會去睇技術指標，決定出入巿的時機。